Японы Чиба муж-ийн Ичикава хот дахь нэгэн жижигхэн амьтны хүрээлэн дэлхийн анхаарлын төвд орно гэж хэн санах билээ. Гэвч “Punch” нэртэй бяцхан япон макака сармагчин энэ бүхнийг өөрчилж чадлаа.
Дэлхий даяар Punch-ийг хайрлах сэтгэл асар хурдтай тархаж, 3-р сарын 29-ний байдлаар түүнийг дэмжих хандив бараг 19.5 сая иенд хүрээд байна. Амьтны хүрээлэн 3-р сарын 16-нд албан ёсны #GanbarePunch дэмжигчдийн хөтөлбөрөө эхлүүлсэн бөгөөд Япон төдийгүй гадаадын шүтэн бишрэгчдийн хүсэлт тасрахгүй ирсний дараа ийнхүү албан ёсны хандивын сувгаа нээжээ.
Цугларсан бүх хөрөнгийг Punch-ийн амьдрах орчныг сайжруулах, мөн амьтны хүрээлэнгийн ерөнхий нөхцөлийг сайжруулахад зарцуулахаар төлөвлөсөн байна. Хандивын аян тавдугаар сарын 31 хүртэл үргэлжлэх аж.
Токиогоос зүүн тийш орших энэ даруухан хотын амьтны хүрээлэн хэдхэн сарын өмнө Японоос гадуур бараг танигдаагүй байсан бол өнөөдөр дэлхийн анхаарлыг татсан газар болж хувирчээ. 2026 оны 2-р сард Punch олны хайрыг татсанаас хойш зочдын тоо хоёр дахин өссөн байна.
Түүний нөлөө үүгээр зогссонгүй. IKEA хүртэл орангутан чихмэл тоглоомоо дэлхий даяар борлуулж эхэлж, Lisa зэрэг алдартнууд хүртэл өөрийн биеэр ирж сонирхжээ.
Энэ бүхэн ердөө нэг хаягдсан бяцхан сармагчин, түүний тэвэрдэг чихмэл орангутан хоёроос эхэлсэн гэдгийг бодоход итгэмээргүй. Гэхдээ Punch бидэнд нэг зүйлийг сануулж байна заримдаа хамгийн жижиг түүх л дэлхийн хамгийн том сэтгэлийг хөдөлгөж чаддаг.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!