Э.Халиунболд "Дакар Ралли"-д Ази тивийг манлайлж эхний 5-д бичигдлээ

“Дакар ралли” уралдааны хамгийн хэцүү үе болох марафон гараа өндөрлөлөө. Марафон нь хоёр гараанаас бүрдэж, нийт 1000 орчим км замыг тамирчид туулсан бөгөөд тамирчид хээрээр хоноглосноороо онцлогтой. Тав дахь гараанд манай тамирчдаас гавьяат тамирчин Э.Халиунболд нийлбэр дүнгээр 11, “Ралли-2” ангилалдаа тавдугаар байр эзэллээ. Авто болон мото спортын олимп гэгддэг “Дакар ралли” уралдааны 48 жилийн түүхэнд Ази тамирчин эхний тавд бичигдэж байгаагүй юм. Э.Халиунболд нийлбэр дүнгээр 5 дахь гарааны дараах байдлаар 5-т бичигдсэн анхны Монгол тамирчин, анхны Ази хүн болж байна. “Тал нутгаас Дакарт” төслийн тамирчин Э.Халиунболд нийт замаа 4 цаг 23 минут 23 секундэд барианд орсон байна. Тэгвэл олон улсын хэмжээний мастер П.Мөрөн нийлбэр дүнгээр 38, Ралли-2 ангилалдаа 28 дугаарт жагсаж байна. Түүний мотоциклд техникийн асуудал үүссэн ч манай тамирчин тэсвэр тэвчээртэйгээр даван туулж, уралдаанаа зогсолтгүй үргэлжлүүлэн, байрлалаа хадгалж барианд орлоо. Өнөөдрийн гараа Хайль хотоос Эр-Риядын зүг 920 км замыг туулна. Үүнээс уралдааны цаг тооцох 331 км бөгөөд нийт замын 15 хувь нь хатуу шороо, 57 хувь нь элсэрхэг, 28 хувь нь элсэн манхан байх аж. Өнөөдрийн гарааг дуусгаснаар тамирчид нийт уралдааныхаа 50 хувийг ардаа орхих юм.