Монголын 8 жилийн экспорттой тэнцэх "Бортээг"-ийн ордыг эргэлтэд оруулна

Монголын 8 жилийн нүүрсний экспорттой тэнцэх нөөцтэй Бортээгийн орд ашиглалтад орно. Энэ долоо хоногт Бортээгийн ордыг эдийн засгийн эргэлтэд оруулах бэлтгэл ажлыг хангах, хөрөнгө оруулагчийг сонгон шалгаруулах ажлын хэсэг байгууллаа. Тэгвэл өнөөдөр эхний шатанд хөрөнгө оруулагчдын сонирхлыг тодорхойлох зорилгоор олон улсын нээлттэй санал авах хүсэлтийг зарлаад байна. Бортээг нь Таван толгойн 6 бүлэг ордын нэг хэсэг бөгөөд 2020 оны ТЭЗҮ-ээр тус орд нь 424 сая тн нүүрсний нөөцтэйгөөс 95%-ийг сул коксжих, 5%-ийг эрчим хүчний нүүрс эзэлж буйг баталжээ. Түүнчлэн энэ оны эхний улиралд багтан дахин ТЭЗҮ боловсруулах төлөвлөгөөтэй байна. Мөн энэхүү орд нь Эрдэнэс Тавантолгой ХК-ийн эзэмшдэг тусгай зөвшөөрлийн талбайд багтдаг ба компанийн эзэмшилд Тавантолгойн нүүрсний бусад бүлэг орд болох Цанхи, Бортолгой, Ончхараат зэрэг хэсгүүд ордог аж. Өнгөрсөн онд УИХ-ын экс дарга Д.Амарбаясгалангийн холбоотой гэх Админерал компанийн багтсан МТАС түншлэл 2021 онд Тавантолгойн бүлэг ордын Бортээгт хөрс хуулах, нүүрс олборлох, өрөмдөх, тэслэх, нүүрс баяжуулах үйлчилгээ үзүүлэхээр тендерт шалгарч гэрээ байгуулж байв. Гэсэн ч 2025 онд тус гэрээг цуцалсан түүхтэй.