Иран, Израилын зэвсэгт мөргөлдөөн хурцадмал байдалд шилжиж, Ойрх Дорнодын бүс нутгууд руу хүртэл пуужин харвах болсон. Мөн Дубайн нисэх буудал руу хоёр ч удаа дроноор халдсан тохиолдол гарсан.
Одоогоор тус бүс нутагт манай улсын 400 гаруй иргэн байгаагаас 200 орчим нь эх орондоо буцах хүсэлтээ гаргаад байна. Гэвч үүссэн нөхцөл байдлын улмаас дэлхийн нийт агаарын тээврийн 50 хувь, Дубайн агаарын тээврийн 80 хувь нь цуцлагдаад байгаа юм.
Харин Засгийн газрын шийдвэрээр МИАТ-ын тусгай үүргийн онгоц иргэдээ авчрахаар өнөө өглөө Дубай руу шууд нислэг үйлдлээ. Улмаар Монголын цагаар 19:40 цагт Дубайгаас эх орныхоо зүг хөөрсөн бөгөөд төлөвлөгөөт цагийн дагуу үүрийн 04:45 цагт эх орондоо газардах хуваарьтай байна.
Зэвсэгт мөргөлдөөний эрсдэлтэй бүст тооцогдож буй Оманы булангийн агаарын замаар МИАТ-ын онгоц иргэдээ аван эх орныхоо зүг нисэж явааг нислэгийн хяналтын аппликейшний энэхүү зургаас харж болно. Олон улсын зарим нислэг энэхүү эрсдэлтэй бүсийг тойрч, зарим нь нислэгээ бүрмөсөн цуцлаад байгаа юм.
Энх тайван эх орондоо сайн яваад ирэхийг нислэгийн баг болон нийт иргэддээ хүсье!
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!