Өсөлтийн даавар буюу Гроус Хормоун нь хүүхдийн өндрийн өсөлт, яс, булчингийн өсөлт, уураг нийлэгжилт, өөх задрал, эсийн нөхөн төлжилтөд гол үүргийг гүйцэтгэдэг байна. Энэхүү даавар нь ихэвчлэн сайн унтаж амрах, дасгал хөдөлгөөн хийх, сахар багатай уураглаг хоол хүнс хэрэглэсэн үед мөн биеийн температур нэмэгдэх үед илүү идэвхтэй ажилладаг. Тэгэхээр хүүхэд даарах тусам өсөлтийн дааврын ялгаралт тодорхой хэмжээгээр буурдаг гэж судлаач үзжээ.
Олон улсын судалгаагаар 4 °C орчим хүйтэнд 1-2 цаг байхад өсөлтийн даавар буюу GH нэмэгдээгүй боловч тасалгааны 22 градусын дулаан орчинд 1-2 цаг болоход огцом нэмэгдэж байжээ. Хүйтэн орчинд хүний бие амьд үлдэх эсвэл биеийг дулаацуулахад энергиэ зарцуулдаг тул өсөлтийн даавар түр саатдаг гэж шинжлэх ухаанаар тайлбарладаг юм байна.
Өсөлтийн даавар идэвхтэй ажиллаж байгаа ч зарим хүүхэд өсдөггүй шалтгаан нь ясны мөгөөрсний ургалт буурсантай бас холбоотой байдаг. Энэхүү ургалтыг идэвхжүүлэхийн тулд кальциар баялаг хоол хүнс, өндөгний шар, самар идэх, нарны туяанаас витамин д авах эсвэл нэмэлтээр ууж хэрэглэх шаардлагатай. Мөн мах,өндөг, сүү, сүүн бүтээгдэхүүн, шош, буурцаг зэрэг уураглаг хүнс ясны хөгжилд шууд эерэг нөлөө үзүүлдэг.
Мөн явган алхах, гүйх, үсрэлттэй дасгал, бөмбөг тоглох зэрэг нь ясны өсөлтийг дэмждэг байна. Хүүхэд, өсвөр насандаа шөнийн цагаар 8-10 цаг унтаж байх нь чухал.
Өсөлтийн даавар ихэвчлэн шөнийн гүн нойрны үед хамгийн сайн ялгардаг, тиймээс унтах цагийг тогтмол барих хэрэгтэй. Оройн 19:00-22:00 цагийн хооронд буюу аль болох 22:00 цагаас өмнө унтах нь хамгийн үр дүнтэй ажээ.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!