Их Британийн иргэн Карл Бушби 1998 онд дэлхийг тойрон алхах "Голиат" аялалаа эхлүүлсэн бөгөөд энэ нь түүхэнд тэмдэглэгдэх хамгийн урт удаан, тууштай явган аяллын нэг болсон юм. Тэрээр эхний алхмаа Лондон хотоос эхэлсэн байна. Карл богино зам, хялбарчилсан маршрут сонгож, тээврийн хэрэгсэл ашиглахгүй байх амлалт өгчээ.
Аяллынхаа 27 жилийн туршид Карл Бушби нийт 57,000 км буюу дэлхийн тойргийн бараг нэг дахин урт зайг алхсан байна. Түүний маршрут нь маш олон өөр өөр газар нутгаар дамжсан бөгөөд Америк тивийг туулж, түүний дотор Канад, АНУ, Латин Америкийг тойрсон. Тэрээр мөн Берингийн хоолойн мөсөн дээгүүр алхаж, Оросын хилээр явган нэвтэрсэн анхны хүн болсон байна.
Аяллынхаа явцад Карл олон саад бэрхшээлтэй тулгарсан. Улс төрийн хориг, визний асуудал, хүйтэн уур амьсгал, элсэн шуурга, зарим нутагт амьдралын дэг журмын ялгаа зэрэг олон хүндрэлүүдтэй нүүр тулсан ч тэрээр зорилгодоо тууштай байсан. Түүний аяллын үеэр зарим газар нутгийг сэлж туулах, уул, гол, цас мөсний дээгүүр гарах зэрэг эрсдэлтэй, бие махбодыг нь ихээхэн шалгасан сорилтуудыг давсан байдаг.
Өдгөө Карл Европын нутагт ирээд байгаа бөгөөд аяллынхаа сүүлчийн шат болох Их Британи руу алхаж байна. Энэ аялал нь зөвхөн бие махбодын хүч чадал, тэсвэр тэвчээр төдийгүй хүний сэтгэлзүйн бат бөх чанар, тууштай зан чанарын бодит жишээ болж байна. Түүний энэхүү амжилт нь дэлхийн өнцөг булан бүрт хүмүүсийг зорилгодоо тууштай байх, хэзээ ч бууж өгөхгүй байх урам зоригийг өгч буй юм.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!